ធម្មសារ

ភោជន ៥យ៉ាង

បាយ ១ នំស្រស់ ១ នំក្រៀម ១ ត្រី ១ (សំដៅយកសត្វទឹក/បិ.៥,ឃ.៤៩១), សាច់ ១ (គឺសាច់​សត្វ​ទាំង​ឡាយ​​​ដែលគួរ /បិ.៥,ឃ.៤៩១)។ (បិ.៤.១៥៤)

បញ្ចគោរស

ទឹកដោះស្រស់ ១ ទឹកដោះជូរ ១ ខ្លាញ់ ១ ទឹកដោះខាប់ ១ ទឹកដោះ​ថ្លា ១ (បិ.៧,ឃ.១៣៣)

សាច់ ១០យ៉ាង ដែលព្រះអង្គបញ្ញត្ត

សាច់មនុស្ស ១ សាច់ដំរី ១ សាច់សេះ ១ សាច់ឆ្កែ ១ សាច់ពស់ ១ សាច់សីហៈ ១ ​សាច់​ខ្លាធំ ១ សាច់ខ្លាដម្បង ១ សាច់ខ្លាឃ្មុំ ១ ​សាច់ឆ្កែព្រៃ ១។

ភិក្ខុឆាន់សាច់មនុស្ស ត្រូវអាបត្តិ​ថុល្លច្ច័យ (បិ.៧,ឃ.១០៧)។ ភិក្ខុឆាន់សាច់​ ៩យ៉ាង​ដទៃ​ទៀត ត្រូវ​អាបត្តិ​ទុក្កដ (បិ.៧,ឃ.១០៨)។

អដ្ឋបាន ទឹកបាន ៨យ៉ាង (បិ.៧,ឃ.១៣៤)

ព្រះតថាគត​អនុញ្ញាត​ទឹកបាន​ទាំងឡាយ ៨យ៉ាង គឺ ទឹកផ្លែស្វាយ ទឹកផ្លែព្រីង ទឹកផ្លែចេក​មាន​គ្រាប់ ទឹកផ្លែចេក​ឥតគ្រាប់ ទឹកផ្លែស្រគំ ទឹកផ្លែចន្ទន៍ ទឹកក្រអៅឈូក ទឹកផ្លែមាក់ប្រាំង [អដ្ឋកថា ថា ទឹកអដ្ឋបាន​ទាំងនេះ ជារបស់​ត្រជាក់ក្តី ឆ្អិនដោយ​​កំដៅថ្ងៃក្តី ក៏គួរ បើចំអិន​​ដោយភ្លើង មិនគួរ។]។

ម្នាលភិក្ខុ​ទាំងឡាយ តថាគត​​អនុញ្ញាត​​ទឹកផ្លែឈើ​​គ្រប់យ៉ាង លើកលែង​តែ​ផ្លែស្រូវ [បានដល់​ស្រូវ ៧ប្រការ។]។

ព្រះតថាគត​​អនុញ្ញាត​​ទឹកស្លឹកឈើ​គ្រប់យ៉ាង លើកលែង​តែទឹកបន្លែ​ដែលឆ្អិន​ហើយ [រស​ពួក​ស្លឹកឈើ ដែល​​ជា​យាវកាលិក ជារបស់​គួរ​ក្នុង​បុរេភត្ត​ប៉ុណ្ណោះ រសស្លឹកឈើ ដែល​ជា​យាវជីវិក ភិក្ខុ​ចំអិន​​លាយ​នឹង​សប្បិ​ជាដើម គួរ​អស់​កាល​ ៧ថ្ងៃ បើចំអិន​ដោយ​ទឹកសុទ្ធ គួរដរាប​ដល់អស់ បើ​ចំអិន​​ដោយ​ទឹកដោះ​​ជាដើម មិនគួរ សូម្បី​ស្លឹកឈើ​​ដែលគេ​ចំអិន​​ដោយវត្ថុឯ​ទៀតៗ ក៏ហៅ​ថា រសបន្លែ​ដែរ។]

ព្រះតថាគតអនុញ្ញាត​ទឹកផ្កាឈើគ្រប់យ៉ាង លើកលែង​តែ​​ទឹក​ផ្កា​ស្រគំ។

ព្រះតថាគត​អនុញ្ញាត​ទឹកអំពៅ។

អានិសង្សបបរ ១០យ៉ាង

បុគ្គល​អ្នកឲ្យបបរ ឈ្មោះថា ឲ្យអាយុ ១ ឲ្យពណ៌​សម្បុរ ១ ឲ្យសេចក្តីសុខ ១ ឲ្យ​កំលាំងកាយ ១ ឲ្យប្រាជ្ញា ១ បបរ​ដែល​បុគ្គល​​ហុត​ទៅហើយ រមែង​​ហាមឃាត់​​សេចក្តី​ឃ្លាន ១ បន្ទោបង់​សេចក្តី​​ស្រេក ១ ញុំាង​ខ្យល់​​ឲ្យដើរ​ទៅ​ស្រួល ១ ញុំាង​សរសៃ​​ឲ្យស្អាត ១ ញុំាង​​អាហារថ្មី​​ដ៏សេសសល់​​ឲ្យរលួយ ១ (បិ.៧,ឃ.១០៩)។

សូមអនុមោទនា !!!

Oben-pfeil